Belge Özeti : Ordu’dan hicret ederek İzmid ve Bolu civarındaki ormanlık alana yerleşerek ormanları tahrip eden muhacirlerin memleketlerine veya boş bir araziye nakledilmeleri./ Düzce’nin Dipsizgöl karyesindeki Ordululara Abaza Arslan Bey ve avanesi arasındaki münazaa evrakının Adliye Nezareti’ne irsali.
Belge Özeti : Ordu’dan hicret ederek İzmid ve Bolu civarındaki ormanlık alana yerleşerek ormanları tahrip eden muhacirlerin memleketlerine veya boş bir araziye nakledilmeleri./ Düzce’nin Dipsizgöl karyesindeki Ordululara Abaza Arslan Bey ve avanesi arasındaki münazaa evrakının Adliye Nezareti’ne irsali.
Yer Bilgisi : 10-16
Dosya Ek :
Belge Tarihi : H-19-04-1328 (M-30-04-1910)
Kurum : DH.MUİ.
Dili :
105.poz
Meclis-i meb’usan riyaset-i celilesine
Ma’ruz-ı çakerleridir ki
An-asl Trabzonun Of ve Gümüşhane ve Vakf-ı Kebir ve Giresun kazâları ve Şarlı nâhiyesi ahâlisinden olub mevâki-i mezkûrede arazinin darlığından ve fakr-u ihtiyacımızdan dolayı bi’zzarur Düzce kazâsına hicret ve kazâ-i mezkûr civarında ormana ve gerek sâire mazarrat etmeksizin mahal-i münâsebeye tavattun ederek 15 seneden berü tekâlif –i emîriyeyi kâmilen îfâ etmekde olduğumuz gibi inşâ eylediğimiz hânelerin ruhsatnâmeleriyle cevâmî-i şeriflerin beratları ve vergü koçanları dahî yedimizde mahfuzdur.
2-3 sene zarfında Düzceye gelen ve henüz Düzce nüfusunda mukayyed olmayan ordu muhacirleri hakkında hükümet-i mahalliyenin şikayetiyle orman idaresinden vaki’ olan tesbit üzerine memleketlerine sevk edilmeleri zımmında dahiliye nezaret-i celilesinden şerefvarid olan emr-i celil-i ahkami meyanında fırsatdan bil-istifade bizleri dahi idhal ederek hükumet-i mahalliye hakkımızda bir muamele-i ğayr-ı adilaneye kalkışdı.
15 senelik bir müddet…. zarfında ahali-i kadime şeklini iktisab etmekle hakk-ı kararımız sabit olacağı ve karyelerimizin cesametiyle ihya eylediğimiz tarlaların etrafında hendek ve eşcar ğars etmek gibi esbab-ı tasarrufiyemizle müddet-i mezkure zarfında bila niza’ tasarruf etdiğimiz tarla ve hane ve samanlıklarımızı nesyen mensiyyen terk etdirerek şu kadar bin nüfus i’bad-ı müslimin ve evlad-ı vatanı vadi-i hicret ve safalete düçar etdirmek gibi hükümet-i mahalliyenin şu muamelesi külliyen mahvımızı intaç edeceğinden müslim-i inam-ı alemiyan merhamet ve adalet olan meclis-i milliye-i hazret-i riyasetpenahilerine iltica ederiz.
Lütfen ve merhameten hakkımızda tertib olunan şu muamele-i na-revanın men’iyle kema fis-sabık asayişin iade etdirilmesiyle sevkleri icab eden ordu muhacirleri güruhundan tefrik ve ber-vech-i hak karar tapularımızın iade buyurulmasını selamet-i vatan ve adalet adına istirham eyleriz.
Ol-babda emr-u ferman hazret-i men lehul emrindir. Fi 13 Mart sene (1)326 (M-26-03-1910)
Düzcenin Efteni Saçmalıpınar karyesi ahalisi Namına: Mehmed…
Düzcenin Efteni Yunus Efendi karyesi ahalisi namına :Ali
Düzcenin Çakırsayvan karyesi ahalisi namına: Hasan
Düzcenin Çatalçam karyesi ahalisi namına :Yusuf
Düzcenin Sığırlık karyesi ahalisi namına hatib:Mustafa
Düzcenin Bıçkıyanı karyesi ahalisi namına hatib ve imam:
Düzcenin Oruçdibi karyesi ahalisi namına
Düzcenin Dipsizgöl karyesi ahalisi namına
Arzuhal olunmuşdur